Vətən müharibəsi şəhidlərinin Anım Günləri çərçivəsində “Sosial Dövlət Naminə” İctimai Birliyinin nümayəndələri qəhrəman şəhidimiz İsrayıl Cəfərzadənin anım mərasimində iştirak ediblər.
“Sosial Dövlət Naminə” İctimai Birliyinin Binəqədi rayon təşkilatının mətbuat xidmətindən verilən məlumatda bildirilir ki, Zəfər tariximizin şanlı səhifəsi olan 44 günlük Vətən müharibəsinin şəhidlərini yad etmək məqsədilə 30 sentyabr 2026-cı il tarixində təşkilatın Bakı şəhəri və müxtəlif rayonlar üzrə regional nümayəndəlikləri, eləcə də fəal üzvləri tərəfindən genişmiqyaslı ziyarət tədbirləri həyata keçirilib.
Bu silsilə tədbirlər çərçivəsində İctimai Birliyin Binəqədi rayon təşkilatının rəhbərliyi və fəalları Vətən müharibəsi şəhidi Cəfərzadə İsrayıl Namiq oğlunun anım günü mərasiminə qatılıblar. Yüksək təşkilatçılıq və dərin ehtiram mühitində keçirilən mərasimdə şəhidimizin keçdiyi şərəfli ömür və döyüş yolu geniş yad edilib.
Tədbirdə çıxış edən şəhidin sinif müəlliməsi və xidmət etdiyi hərbi hissənin komandiri İsrayıl Cəfərzadənin təhsildə göstərdiyi savadı, nizam-intizamı, eləcə də döyüş meydanında nümayiş etdirdiyi unudulmaz cəsarət və qəhrəmanlıqdan ürəkdolusu söz açıblar. Qeyd olunub ki, İsrayıl kimi igid oğulların göstərdiyi şücaət sayəsində bu gün torpaqlarımız azaddır və onların xatirəsi xalqımızın qəlbində əbədi yaşayacaqdır.
Mərasimdə “Sosial Dövlət Naminə” İctimai Birliyinin Binəqədi rayonu üzrə Qadınlar Şurasının sədri Əntiqə Hüseynova çıxış edərək, 44 günlük Vətən müharibəsində qazanılan tarixi Qələbədən və şəhidlərimizin müqəddəs ruhu qarşısındakı mənəvi borcumuzdan ətraflı bəhs edib. Əntiqə Hüseynova İctimai Birlik adından xüsusi təsis edilmiş “Qarabağ Azərbaycandır!” diplomunu təntənəli şəkildə şəhidimizin anasına təqdim edib.
Daha sonra Qadınlar Şurasının sədr müavini Şəmsiyə Qurbanova çıxış edərək şəhidin valideynlərinə və doğmalarına dərin hüznlə başsağlığı verib, bütün şəhidlərimizin ruhuna rəhmət, ailələrinə isə səbir diləyib.
Qadınlar Şurasının digər müavini Şəhla Vəliyeva isə Vətən ucalığına və şəhidlərimizə həsr etdiyi təsirli şeirini səsləndirərək mərasimə kövrək və qürurverici anlar qatıb.
Yüksək ehtiram və birlik ruhunda baş tutan anım tədbirinin sonunda şəhid İsrayıl Cəfərzadənin əziz xatirəsini əbədiləşdirmək məqsədilə ailə üzvləri və təşkilat nümayəndələri ilə birgə xatirə şəkilləri çəkilib.
Allah Cəmi Şəhidlərimizin Ruhlarını Şad, Məqamlarını Uca Etsin.
“Sosial Dövlət Naminə” İctimai Birliyinin,
Binəqədi rayon Təşkilatının mətbuat xidməti
