Görüş çərçivəsində tərəflər arasında qarşılıqlı əməkdaşlığın davam etdirilməsinin, birgə sosial proqramların və maarifləndirici tədbirlərin keçirilməsinin vacibliyi xüsusi qeyd edilmişdi
“Sosial Dövlət Naminə” İctimai Birliyinin Binəqədi rayon Təşkilatının mətbuat xidmətindən verilən məlumatda bildirilir ki, 20 oktyabr 2026-cı il tarixində İctimai Birliyin Binəqədi rayon Qadınlar Şurasının sədri Hacı Əntiqə Hüseynova (Zəngilanlı), sədr müavinləri Şəmsiyə Qurbanova və Şəhla Vəliyeva ilə birlikdə akademik N.Tusi adına klinikanın Fizioterapiya şöbəsinin həkim kontingenti ilə unudulmaz və səmimi bir görüş keçirmişlər.
Görüş zamanı Binəqədi rayon Qadınlar Şurasının sədri, Hacı Əntiqə Hüseynova (Zəngilanlı) “Sosial Dövlət Naminə” İctimai Birliyinin yarandığı ilk gündən bu günə qədər keçdiyi şərəfli fəaliyyət yolundan, cəmiyyətdə sosial ədalətin və həmrəyliyin möhkəmlənməsinə verdiyi dəyərli töhfələrdən geniş söz açmışdır. O, vurğulamışdır ki: “Bizim əsas qayəmiz dövlətimizin sosial siyasətinə dəstək olmaq, xalqımızın ehtiyac duyan hər bir fərdinə, xüsusilə Vətən uğrunda canından keçən şəhidlərimizin əmanətlərinə və qazilərimizə təmənnasız xidmət etməkdir. Bu müqəddəs yolda həkimlərimizin, fədakar tibb işçilərimizin rolu əvəzsizdir. Ağ xalatlı həkimlərimiz həm ön cəbhədə, həm də arxa cəbhədə xalqımızın sağlamlığı və ruh yüksəkliyi üçün əsl fədakarlıq nümunəsi göstərmişlər.”
Görüş çərçivəsində tərəflər arasında gələcəkdə də qarşılıqlı əməkdaşlığın davam etdirilməsinin, birgə sosial proqramların və maarifləndirici tədbirlərin keçirilməsinin vacibliyi xüsusi olaraq qeyd edilmişdir. Vurğulanmışdır ki, bu cür sıx əlaqələr cəmiyyətdə xeyriyyəçilik və sosial məsuliyyət ənənələrini daha da gücləndirəcəkdir.
Tədbirin ən təsirli və qürurverici məqamı isə fədakar səhiyyə işçisinin əməyinə verilən yüksək qiymət olmuşdur. Görüşün sonunda, Fizioterapiya şöbəsinin tanınmış və ictimaiət arasında dərin hörmət qazanmış həkimi Əliyeva Südabə Camal qızı – Qarabağ Vətən Müharibəsi zamanı və müharibədən sonrakı dövrdə gedən amansız döyüşlərdə qəhrəmancasına şəhidlik zirvəsinə ucalan igidlərimizin ailə üzvlərinə, eləcə də canlarını Vətənə fəda edən Qazilərimizə göstərdiyi sonsuz diqqət, yüksək qayğı və peşəkar tibbi dəstəyə görə "Sosial Dövlət Naminə" İctimai Birliyinin Fəxri Üzvü seçilmişdir. Bununla yanaşı, İctimai Birliyin İdarə Heyətinin qərarı ilə təsis olunmuş "Qarabağ Azərbaycandır" fəxri diplomu da təntənəli şəkildə Südabə həkimə təqdim edilmişdir.
Təltif olunan həkim Südabə Əliyeva göstərilən bu yüksək diqqət və etimada görə təşkilat rəhbərliyinə dərin minnətdarlığını bildirmiş, bundan sonra da Vətən övladlarına xidmət etməyi özünə müqəddəs borc biləcəyini vurğulamışdır.
“Sosial Dövlət Naminə” İctimai Birliyinin
Binəqədi rayon Təşkilatının mətbuat xidməti
