Fəxriyyə Hüseynova: "...bu sahəni hər zaman xüsusi diqqət mərkəzində saxladıqlarına görə ölkə Prezidenti cənab İlham Əliyevə və Birinci vitse-prezident xanım Mehriban Əliyevaya bütün təhsil işçiləri adından dərin minnətdarlığımızı bildiririk".
Sosialdovlet.az “Sosial Dövlət Naminə” İctimai Birliyinin mətbuat xidmətinə istinadən xəbər verir ki, Xırdalan şəhər 10 nömrəli tam orta məktəbdə “Yaşıl dünya naminə həmrəylik ili“ çərçivəsində 1 İyun - Uşaqların Beynəlxalq Müdafiəsi Gününə həsr olunmuş "Zəfərdən yaşıl düşüncəyə" adlı tədbir keçirilmişdir.
Tədbirdə Abşeron-Xızı Regional Təhsil Sektorunun müdiri Sənan Xəlilov, baş məsləhətçi Pərviz Əhmədov, “Sosial Dövlət Naminə” Ictimai Birliyinin sədri Faiq Əhmədov, ATİAHİ-nin sədri Fəxrəddin Eyvazov, Abşeron-Xızı Regional Təhsil Sektorunun əməkdaşı Könül Nəcəfova, Xırdalan şəhər 10 nömrəli tam orta məktəbin direktoru Fəxriyyə Hüseynova, məktəbin müəllim və şagird kollektivi iştirak edirdilər.
Tədbirdə Azərbaycanın himni səsləndirildikdən sonra, Torpaqlarımız uğrunda şəhidlik zirvəsinə ucalan şəhidlərimizin ruhu bir dəqiqəlik sükutla yad edilmişdir.
Sonra "Zəfərdən yaşıl düşüncəyə" adlı keçirilən tədbirdə məktəbin təsviri incəsənət müəlliməsi Ramilə Allahyarovanın şagirdlərinin çəkdikləri rəsm əsərləri iştirak edən qonaqlara nümayiş etdirildi.
Eyni zamanda digər şagirdlər isə tədbirdə iştirak edən qonaqları hazırladıqları rəqs və mahnılarla salamladılar.
Bundan sonra çıxış edən məktəbin direktoru Fəxriyyə Hüseynova ilk növbədə tədbirə gələn qonaqları, şəhid analarını, müəllimləri, şagirdləri və onların valideynlərini, salamlayaraq öz çıxışında Azərbaycanda təhsilin inkişafına olan dövlət qayğısından söz açaraq, bu sahədə əldə olunan nailiyyətlərdən bəhs etdi.
Məktəb direktoru bu sahəni hər zaman xüsusi diqqət mərkəzində saxladıqlarına görə ölkə Prezidenti cənab İlham Əliyevə və Birinci vitse-prezident xanım Mehriban Əliyevaya bütün təhsil işçiləri adından dərin minnətdarlıqlarını bildirdi.
Daha sonra digər natiqlərlə yanaşı çıxış edən “Sosial Dövlət Naminə” İctimai Birliyinin sədri Faiq Əhmədov gələn qonaqları salamlayaraq, tədbirdə iştirak edən şəhid analarının qarşısında baş əyərək, 1 İyun Uşaqlar Günü münasibətilə müəllimləri və şagirdləri təbrik etdi.
Həmçinin öz çıxışında İctimai Birliyin sədri Faiq Əhmədov müəllim sənətinin aliliyini xüsusi olaraq vurğulamışdı. Bu baxımdan Umummilli Lider Heydər Əliyevin fikirlərinin böyük əhəmiyyət kəsb etdiyini deyən Faiq Əhmədov qeyd etmişdir ki; “Ümummilli Lider Heydər Əliyev hər zaman öz çıxışlarında qeyd edirdi ki, müəllim sənətindən gözəl və çətin sənət yoxdur”. Digər bir çıxışında Ümummilli Lider Heydər Əliyev uşaqlar haqqında belə deyirdi: "Uşaqlar bizim gələcəyimizdir, gələcəyimizi nə cür tərbiyə edəcəyiksə, ölkəmizin, millətimizin, dövlətimizin sabahı da, bundan asılı olacaqdır".
Faiq müəllim daha sonra çıxışında uşaqlara Makedoniyalı İsgəndərin həyatından maraqlı bir epizod barədə bəhs edərək bunları demişdi: “Bir gün Makedoniyalı İsgəndər adlı sərkərdədən soruşurlar ki, müəllimini çox sevirsən, yoxsa valideyinini? İsgəndər tərəddüd etmədən cavab verir ki, müəllimimi. Çünki valideynim məni dünyaya gətirib, müəllimim isə mənə dünyanı bəxş edib.
Əziz və sevimli balalarımız, siz də hər zaman çalışın ki, müəlliminizi çox sevəsiniz. Sevəsiniz ki, müəlliminiz də elm, savad öyrətməklə yanaşı, dünyanı da sizə bəxş edə bilsin. Bir daha bayramınız mübarək olsun!”
Sonda, tədbirin ərsəyə gəlməsində zəhməti olan müəllimlərimizə təşəkkür edilərək, xatirə şəkilləri çəkildi və məktəbin əlaçı oxuyan şagirdlərinə 1 İyun Uşaqlar Günü münasibətilə fəxri fərmanlar hədiyyə olundu.
İlahə Məmmədova,
"Sosial Dövlət Naminə" İctimai Birliyinin,
İctimaiyyətlə Əlaqələr Şöbəsinin müdiri