Tədbirdə 44 günlük Vətən müharibəsinin qəhrəmanı Səbuhi Əsədovun anasına "Qarabağ Azərbaycandır!" diplomu təqdim olunub.
Sosialdovlet.az xəbər verir ki, 8 oktyabr 2026-cı il tarixində “Sosial Dövlət Naminə” İctimai Birliyinin nümayəndə heyəti 44 günlük Vətən müharibəsinin iştirakçısı, unudulmaz şəhidimiz Səbuhi Azər oğlu Əsədovun il dönümü münasibətilə keçirilən anım mərasimində iştirak edib. Anım tədbiri şəhidimizin anası Cahan xanımın xüsusi dəvəti ilə baş tutub.
Anım mərasimində “Sosial Dövlət Naminə” İctimai Birliyinin Suraxanı rayon Qadınlar Şurasının sədri Təranə xanım Yusifova, Binəqədi rayon Qadınlar Şurasının sədr müavini Şəmsiyə xanım Qurbanova, eləcə də Birliyin Fəxri Üzvü, Qarabağ Vətən Müharibəsi şəhidi İmran Əhməd oğlu Hüseynovun övladı Qızbəs xanım Şirinova təşkilat adından təmsil olunublar.
Tədbir zamanı çıxış edən Birliyin Fəxri Üzvü Qızbəs xanım Şirinova şəhidlərimizin keçdiyi şərəfli və qəhrəmanlıqla dolu döyüş yolundan, Vətən uğrunda göstərdikləri misilsiz fədakarlıqdan bəhs edib. O, çıxışında vurğulayıb ki, canları və qanları bahasına torpaqlarımızı azad edən qəhrəman övladlarımızın xatirəsi hər zaman xalqımızın qəlbində uca tutulacaq.
Çıxışın sonunda “Sosial Dövlət Naminə” İctimai Birliyinin İdarə Heyətinin müvafiq qərarı ilə təsis edilmiş "QARABAĞ AZƏRBAYCANDIR" diplomu şəhidimiz Səbuhi Əsədovun anası Cahan xanıma təntənəli şəkildə təqdim olunub. Təşkilat nümayəndələri şəhid anasına dərin ehtiramlarını bildirərək hər zaman onların yanında olduqlarını diqqətə çatdırıblar.
Qeyd edək ki, şəhid Səbuhi Əsədovun anım mərasimində şəhid ailələri, müharibə veteranları, qazilər və ictimaiyyət nümayəndələri ilə yanaşı, Suraxanı Rayon İcra Hakimiyyətinin məsul vəzifəli şəxsləri də iştirak edərək qəhrəmanımızın xatirəsini ehtiramla yad ediblər.
ALLAH BÜTÜN ŞƏHİDLƏRİMİZƏ RƏHMƏT ELƏSİN!
Kəmalə Rüstəmova,
“Sosial Dövlət Naminə” İctimai Birliyinin İctimaiyyətlə
Əlaqələr Şöbəsinin əməkdaşı
