2 İyul Azərbaycan Polisi Günüdür!
Polis, bildiyimiz kimi, ictimai asayişi, ölkədaxili təhlükəsizliyi təmin edən güc mənbəyidir.
Azərbaycanda da polisin əsas işi bu fundamental zərurəti təqdir etmək, ictimai təminatda dövlətə dəstək verməkdir. Məhz buna görə Azərbaycan da daxil olmaqla, əksər ölkələrdə əhali “Mənim polisim məni qoruyur” ifadəsini işlədir. Bilirik ki, 1998-ci ilə qədər ölkəmizdə "Azərbaycan polisi günü" hər il iyunun 6-da qeyd edilib. 24 may 1998-ci ildə Ümummilli Lider Heydər Əliyevin müvafiq Fərmanına əsasən bu tarix dəyişdirilib, 1918-ci ildə Azərbaycan Demokratik Respublikası Daxili İşlər Nazirliyinin tərkibində ilk polis orqanlarının təsis edildiyi gün - 2 İyul Azərbaycan Polisi Günü elan edilib. Həmin vaxtdan etibarən xalqımız özünün güvənc yeri, təhlükəsizlik hamisi hesab etdiyi polisi peşə bayramı günü daha şövqlə təqdir edir, polisin dövləti dəyərlərdə ümdə yer tutduğunu dilə gətirir.
Azərbaycanın tərəqqipərvər dövlət xadimi, ölməz düha, Ümummilli Lider Heydər Əliyev hələ hakimiyyətdə olarkən polisi dövlətimizin əsas sütunu adlandıraraq deyib: “Dağlıq Qarabağa iddia qaldırılanda ön cərgədə polis dururdu. Polis idi döşünü irəli verən. Polis idi vuruşan. O vaxt ordu yox idi, ordu hissələri yox idi. 1000 nəfərə yaxın polis işçisi torpaqlarımızın azadlığı uğrunda şəhid oldu”.
Ümummilli Liderin polis haqqında dediyi digər sözlərdə də həqiqət gün kimi aydın diqqət çəkir: “Azərbaycanın Daxili İşlər Nazirliyində sədaqətlə xidmət edən insanlar öz vətəndaşlıq borclarına sadiq qalmışlar. Öz xidməti vəzifələrini layiqincə yerinə yetirmişlər...”.
Etiraf olunası haldır ki, 1918-ci ildə də ölkədə ictimai asayişi qlobal səviyyədə təmin edən məhz Azərbaycan polisi olmuşdur. Bu gün də Azərbaycan həqiqətlərinin nizamlı şəklidə ehtiva etməsində Azərbaycan polisi misilsiz rol oynayır. Polis vahid mərkəzləşdirilmiş, hüquq-mühafizə orqanıdır. Dövlətimizin əleyhinə olan qüvvələr bəzi hallarda polisə əks qruplaşmada mövqe tutan dəstə kimi yanaşır, onu insan qanına susamış xarakter hesab edir. Əslində, polis olmasa, ölkədə hərc-mərclik, terror cəhdləri, kəskin cinayət halları, dövlət və dövlətçilik əleyhinə qara piyar və s. baş alıb gedər. Polisin varlığı hesabına ictimai asayiş qorunur, xalqımız və dövlətimiz rahat şəkildə gündəlik qayğılarını çözür. Azərbaycan Respublikasının Prezidenti İlham Əliyevin dediyi fikirlərdə bu reallıq öz ictimai fövqünü tapır: “Azərbaycan xalqı Azərbaycan polisini sevməlidir, ona hörmət etməlidir. Bu gün bu hörmət var və mən istəyirəm ki, daha da çox olsun. Bunu etmək üçün gərək siz yaxşı işləyəsiniz, öz gündəlik fəaliyyətinizdə yaxşı nəticələr göstərəsiniz, cinayətkarlara qarşı daha da amansız mübarizə aparasınız.
Mən bu sahədəki fəaliyyətdən razıyam. Demək olar ki, Azərbaycanda uzun illər ərzində nə cinayətkar dəstə problem yarada bilər, nə də ki, başqa qeyri-qanuni birləşmələr mövcud deyildir. Arzu edirəm ki, bundan sonra da doğma Vətənimizə ləyaqətlə xidmət edəsiniz, Azərbaycanın müstəqilliyinin möhkəmlənməsi işində iştirak edəsiniz.
Azərbaycanda bu gözəl vəziyyəti daha da möhkəmləndirmək üçün, bu gözəl abu-havanı əbədi etmək üçün əlinizdən gələni edəsiniz. Siz bu vəzifəni ləyaqətlə icra edirsiniz”.Ümummilli lider Heydər Əliyev 1993–cü ildə xalqın təkidli tələbi ilə hakimiyyətə qayıtdıqdan sonra respublikada qanunun aliliyinin təmin olunmasını, vətəndaş hüquq və azadlıqlarının yüksək səviyyədə qorunmasını özünün başlıca fəaliyyət prinsiplərindən biri elan etmiş, bu ali məqsədlərin gerçəkləşdirilməsinə yönəlmiş çoxşaxəli tədbirlərin həyata keçirilməsini diqqətdə saxlamışdır.
Elə bu səbəbdən də 1993-cü ildən etibarən - ikinci müstəqillik illərindən başlayaraq Azərbaycanın xilaskarlıq missiyasına qoşularaq asayiş işində bir nömrəli vəzifə tutan polis günümüzün qəhrəmanı, rahat yaşayışımızın qarantıdır. Ümummilli Liderin, ölkə başçımızın yüksək şəkildə təqdir etdiyi polisi kimlərinsə hansı maraq naminəsə aşağılaması yolverilməzdir.
Bu istiqamətdə biz hamılıqla mübarizə aparmalı, polisi sözün əsl mənasında özümüzün inam, etibar və and yerimizə çevirməliyik.
Əziz Azərbaycan polisləri!
Daxili İşlər naziri cənab Vilayət Eyvazov başda olmaqla, hamınızı 2 İyul – Azərbaycan Polisi Günü münasibətilə təbrik edir, peşə fəaliyyətinizdə uğurlar, asayişimiz naminə yorulmazlıq və cansağlığı arzulayıram. Siz varsınız, Azərbaycan həqiqətləri də var. Və nə qədər siz var olacaqsınız, o qədər də ölkəmizi məhvə sürükləməyə cəhd edənlər arxa planda qalacaqlar.
Allah Sizi qorusun!
Hörmətlə: Faiq Əhmədov:
“Sosial Dövlət Naminə” İctimai Birliyinin sədri